E chegan as vacacións de Semana Santa.

Benqueridos/as exploradores e exploradoras, despois de tres semanas traballando telematicamente, chega unha semana de vacacións nas que, a pesar das circunstancias que nos rodean e que coñecedes, debedes e merecedes descansar. Teño que dicir que estou moi orgulloso do voso traballo ao longo destas semanas porque todos e todas, en maior ou menor medida, cumpristes coas vosas responsabilidades, adaptándovos a un sistema de traballo novidoso, laborioso e un tanto frío. Sen dúbida, sodes uns campións que merecedes toda a miña admiración. Agardo de corazón que pronto poidamos volver á escola e seguir aprendendo, porque eu ensínovos pero vós tamén me ensinades a min todos os días. Ensinádesme cando solucionades os vosos conflitos, cando cada días vos esforzades por ser mellores persoas, cando amosades curiosidade e gañas de aprender, cando vos axudades mutuamente, en definitiva ensinádesme cada día coa vosa ilusión, sorrisos e gañas por coñecer o mundo que nos rodea. Por todo iso, e porque sodes vós os que dades sentido a nosa labor docente agardo con moitas ansias que pronto volvamos ao noso cole.

Aínda que como vos acabo de dicir é unha semana para descansar si que vos vou pedir que non abandonedes algo que facemos todos os días: a lectura. Ler non só nos axuda a aprender a interpretar o noso mundo senón que tamén nos axuda e ser mellores persoas, pois as ensinanzas que nos ofrece a lectura van moito máis alá  do académico e intelectual. Neste sentido, vouvos propoñer para estas vacacións a lectura dun libro en galego que actualmente está dispoñible o seu acceso por internet dadas as circunstancias que estamos a vivir. Creo que o seu título ademais supón un empuxe de ánimo, chámase “Boa sorte” e a súa autora é María Solar. Trátase dunha lectura moi amena e sinxela cuxo resumo é o seguinte:

Boa Sorte tiña moi mala sorte. O primeiro que fixo neste mundo foi nacer, e xa non lle saíu ben, porque Boa Sorte naceu de cu". Desde entón estar ao seu carón resultaba perigoso porque calquera cousa podía pasar. Todo foron desfeitas até que un día atopou unha explicación a tanta mala sorte... Pero mellor que a coñezas ti, lendo a súa historia.

Tras a lectura do libro, gustaríame que, dentro das vosas posibilidades, vos gravásedes facendo un pequeno vídeo (por exemplo, co móbil) no que contedes que vos pareceu o libro, se vos gustou, se o recomendariades ou non e o motivo... Podede contar o que queirades. Estes vídeos subireinos ao blog para compartir co resto do cole as vosas opinións sobre esta historia. Que vos parece? É unha proposta voluntaria, pero gustaríame que vos animásedes.

Déixovos o link para que poidades descargar o libro. Moito ánimo e a desfrutar destes días libres dentro das posibilidades que as circunstancias nos permiten. Unha aperta grande a todos e a todas!! Ah, e por suposto, aínda que sexan vacacións seguirei ao voso dispor para o que precisedes. : )

Acceso ao libro: "Boa sorte"